O martes 11 de maio o Club de Letras do Eusebio realizou unha saída a Santiago de Compostela para visitar diferentes lugares que xogan un importante papel no coidado da nosa memoria colectiva e do patrimonio cultural. No itinerario previsto tiñamos pensado, ademais de visitar os museos, realizar un percorrido polas rúas da cidade e polos monumentos que teñen que ver cos coidados, como o Hostal dos Reis Católicos ou a catedral, e pola tarde coñecer a casa museo de Rosalía de Castro en Padrón. Mais a pandemia impediunos entrar en Padrón e o tempo imposibilitou o percorrido a pé. No seu lugar estivemos no parque de Belvís, non veu nada mal ese tempo
de lecer despois de visitar o MUPEGA e o Museo do Pobo Galego.
No MUPEGA fixemos un interesante percorrido polas aulas desde os anos 50 á actualidade e vimos a exposición "Homo Sapiens, transmisor de coñecemento".
No Museo do Pobo Galego chamounos a atención poderosamente a escaleira central, de forma helicoidal, e preparáronnos un xogo de pistas que nos levou a descubrir os segredos das diferentes salas onde se gardan mostras da cultura do noso pobo, cultura do mar, da terra, da música e o canto...
No precioso parque de Belvís xogamos un anaco antes de xantar aproveitando que non chovía, coidando así do noso corpo, aínda que o chan estaba bastante enchoupado... E despois fomos xantar a un centro comercial.
Xantamos moi ben e botamos a tarde na Cidade da Cultura, onde vimos dúas interesantísimas exposicións, unha sobre o antigo Exipto e outra sobre a obra de Isaac Díaz Pardo e do seu pai, Camilo Díaz Valiño. A profesora Paula Cadaveira explicounos a historia de como se planificou e edificou a Cidade da Cultura, en forma de cuncha, como Santiago!
E como non, acabamos a excursión cantando ao entrarmos na Coruña "Vivir na Coruña que bonito é!". Cans@s, felices de volver e desexando repetir. Ata a próxima!
Neste vídeo realizado por Elisa Vidal Prego de 1º ESO A pódese ver o ben que o pasamos neste día.
