Os coidados no instituto: falamos de acoso con Laura e Ana

O departamento de Orientación coida de nós, de todos e todas nós, profesorado, alumnado e familias. Do noso benestar tanto interior como físico, da nosa correcta información, axúdanos a coñecer todas as posibilidades para tomar as decisións que mellor guían o noso camiño, e a realizar o noso labor docente respectando a diversidade e a convivencia en sociedade, que non sempre é doada.

Ana e Mª José son as nosas orientadoras, e traballan arreo por e para nós. Ana Torres, membro do Club de Letras, estivo charlando co grupo sobre o importante e necesario labor do seu departamento, e especialmente de como actuar ante casos de acoso escolar, tanto se somos vítimas como se somos espectadores/as. 

Para isto contamos cunha convidada de excepción, Laura Veiga, unha alumna do Mestrado de Educación que vén de completar con excelencia a súa fase de prácticas para ser profesora de Lingua e Literatura Galegas no noso instituto. Falou en primeira persoa e contounos a súa historia. Abriunos o seu corazón e del saíron medos, abusos, menosprezos, depresións, inseguridades, falta de confianza, de autoestima, unha etapa negra do seu pasado no instituto provocada por un grupo de compañeiras que non a aceptaban. 

Aprendemos moitísimo delas dúas e fixéronnos reflexionar sobre as nosas actitudes e a tan necesaria empatía. 

Mil grazas Ana e Laura!